كل حاجه فى بلدنا أصبحت غريبه
الأرهابى رسموا على قورته زبيبه
والاغانى بتتكتب عن حيوانات فى الزريبه
والأسعار بترتفع بصوره رهيبه
والحرامى بيتغنى ويتهرب من الضريبه
والغلبان بيتمسك ويتحط فى التخشيبه
والبلد كلها أصبحت نهيبه
-------------------------------------
كل حاجه فى بلدنا أصبحت غريبه
النظافه فى الشوارع بقت مافيش
واللبن فاسد من التغشيش
والمراكز العليا محتكرها متقاعدين الجيش
والحكومه نازله سجن فى الأخوان وتطفيش
والشباب بيعانى من الضياع والتهميش
والمساطيل زادوا من غير أفيون ولاحشيش
------------------------------------
كل حاجه فى بلدنا أصبحت غريبه
الزحام زاد فى قاهره المعز
والأنفلونزا طالت الفراخ والوز
والحديد بقى أبن عز
والاسمنت سعره زلزال بيهز
وأحنا مش لاقيين العيش والرز
واللى يعترض يتقال له طز
---------------------------------
كل حاجه فى بلدنا أصبحت غريبه
بعنا كرامتنا ومشينا ورا الامريكان
وطلبنا منهم المعونه والأحسان
والديمقراطيه ماأنش ليها الاوان
واللى يتظاهر يتضرب على ظهره بالعصيان
والمحروقين والغارقنين نسيناهم فى الأكفان
وشغلنا نفسنا بقضيه هاله سرحان
-------------------------------------
كل حاجه فى بلدنا أصبحت غريبه
الجراج بنوه ودفنوه من غير جنازه
وكأن الفلوس كثيره عندنا ومالهاش عازه
والشوارع مليانه باخوان التوربينى وبزازه
ووزاره الشئون وجمعياتها واخده اجازه
والحكومه مرتبطه مع الحزب بجوازه
وأحنا بنشرب من سنين من نفس الازازه
-------------------------------------
كل حاجه فى بلدنا أصبحت غريبه
كل واحد كان بليد فى المدرسه وخايب
كبروا علينا وعملوه نايب
وقزقزه اللب والنوم فى المجلس أمر مايتعايب
والاراضى والشاليهات بتتوزع على الحبايب
والمال العام بيتسرق وكأنه مال سايب
والشعب كله بيعاملوه على أنه غايب
----------------------------------------
كل حاجه فى بلدنا أصبحت غريبه
البقر والجاموس جالها حمى القلاع
وعمر أفندى أتباع من بعد صراع
والدور جاى على باقى القطاع
ورجل أعمال من النوع الطماع
بنى قدام القلعه أبراج وقلاع
والشكل التاريخى للمنطقه ضاع
-----------------------------------
كل حاجه فى بلدنا أصبحت غريبه
قدموا مواد من الدستور للتعديل
والنتيجه كانت تعديل هزيل
واللى يعترض يبقى خاين وعميل
والتزوير شغال الصبح وبالليل
و ناس بتهرب الفلوس وبتعمل لها غسيل
وأصحاب مراكب نايمه وعايشه فى النيل
منسيه من الدوله وكأنهم مجاهيل
كل حاجه فى بلدنا أصبحت غريبه
موضوع: مصر الغريبه 
